家務傾唔掂 遲早變家變

「點解又係我洗碗？」
「我煮咗咪你洗，唔使你做咩！」

不少情侶、夫妻同居之後，都會因為家務分工問題日嘈夜嘈，其實爭拗有時不是單純的「懶唔懶」問題，而係雙方原生家庭，影響大家對「公平」的理解。心理學中「公平理論」（Equity Theory）指出人會比較自己的付出同收穫，如果一方覺得付出同收穫唔成正比時，就會衍行「唔公平」嘅想法，而部分人會針對呢種「唔公平」嘅情況作出抗議或要求改變，上述提到嘅家務分工係常見情況。然而，「公平」嘅定義原來在不同原生家庭成長，會有不同的理解：

如果你在一個「付出型」家庭長大，例如阿媽成日話「唔好計較咁多，做多啲咪學多啲」，咁你可能就會覺得「付出係應該嘅」，甚至會覺得「唔付出就唔值得被愛」。相反，如果你在一個「享受型」家庭長大，例如阿爸成日話「人生苦短，及時行樂」，咁你可能就會覺得「做乜嘢咁辛苦？有得hea就hea啦」，甚至會覺得「多付出係唔化算」。因此，當兩類人遇上時，「付出型」會覺得對方咩都唔做，好吃懶做咁，而「享受型」就會覺得對方咦咦哦哦迫自己做嘢好煩。

另外，仲有一啲因素會影響大家對家務分工嘅睇法。若你出生喺一個較注重「男主外女主內」概念嘅原生家庭中，較容易潛移默化地覺得家務是女性的工作，而男性只係在外負責搵錢，但現代社會雙職家庭情況非常普遍，模式改變同時衝擊咗價值觀，會衍生「大家都有返工，憑咩家務就女人做哂」的想法。

其實原生家庭嘅影響就點都已經存在，我哋要做的不是否定自己被原生家庭灌輸嘅概念，亦不應該將自己的概念強加於伴侶身上，反而可以有以下做法：

1.坦誠溝通
雙方可分享在各自原生家庭嘅家庭分工，分享彼此對「公平的嘅理解，再就此制定一套適合雙方嘅「分工協議」。

2.互相體諒
嘗試理解對方的諗法，體諒對方的難處，例如男方日間做體力勞動工作，返到屋企可能想俾身體休息多點，咁相對可能做體力勞動較少的家務，例如切水果、教小朋友做功課，當然亦可以考慮擅用彼此長處。

3.讚賞對方付出
最後就係無論家務幾簡單易做都好，都不會自動做好的，而係有對方願意為家庭付出嘅貢獻，記得多稱讚對方，提供情緒價值，千祈不要當咗所有家務做好都係應份。

總括嚟講，愛情不是一場單純講求公唔公平嘅「交易」，而係一場「合作遊戲」。最重要不是計較邊個付出多啲，而係互相支持、互相體諒，一齊建立一個屬於你哋的幸福家庭！